دەنساۋلىق ساقتاۋ ىسىندە جۇيەلى ەم الۋ عانا ءوز ناتيجەسىن بەرەدى. ال ناۋقاستاردىڭ جۇيەلى ەم الۋى ءۇشىن ولار قولداناتىن مەديسينالىق پرەپەراتتاردىڭ قولجەتىمدى بولۋى ماڭىزدى. بۇل ورايدا بيىل وبلىستا تەگىن دارى-دارمەكپەن قامتۋعا 4 ميلليارد تەڭگەدەي قارجى قاراستىرىلىپ، جىل باسىنان اتالعان قارجىنىڭ 85،7 پايىزى ماقساتتى يگەرىلىپ ۇلگەردى، دەپ جازادى Qamshy.kz اقپاراتتىق اگەنتتىگى.

تەگىن دارى-دارمەك دارىگەر ۇسىنعان رەسەپتىدەگى پرەپاراتتاردى الۋعا مۇمكىندىگى جوق تۇرعىندار ءۇشىن ۇلكەن كومەك سانالادى. سول سەبەپتەن دە مەديسينالىق قىزمەت ساپاسىنىڭ جوعارىلىلىعىنا قول جەتكىزۋدە تەگىن دارى-دارمەكپەن قامتۋ ءىسىن بولە جارا قاراۋعا بولمايدى.

–اعىمداعى جىلدىڭ قازان ايىندا جىل باسىندا بەرىلگەن بيۋدجەتتىك ءوتىنىمنىڭ قاجەتتىلىگىنەن دارىلىك زاتتار مەن مەديسينالىق بۇيىمداردىڭ 85،7 پايىزى جەتكىزىلدى. وڭىردەگى مەديسينالىق ۇيىمدار 449 اتاۋ بويىنشا قاجەتتى امبۋلاتوريالىق دارى-دارمەكپەن قامتاماسىز ەتىلدى. بۇل ماقساتتا 4 ميلليارد 79 مىڭ تەڭگەدەي قارجى جۇمسالدى.

قازىرگى ۋاقىتتا وبلىس اكىمدىگىنىڭ دەنساۋلىق ساقتاۋ باسقارماسى دارى-دارمەكپەن قامتاماسىز ەتۋدىڭ اقپاراتتىق جۇيەسىمەن جۇمىس جاساۋعا كوشتى. وندا تۇتىنۋشىلار مەن ناۋقاستار ءۇشىن بارلىق مالىمەتتەر ونلاين-رەجيمدە قولجەتىمدى ەتىلگەن. جىل باسىنان بەرى رەسپۋبليكالىق بيۋدجەت ەسەبىنەن 97 252 ناۋقاس قاجەتتى 398 636 دانا پرەپاراتمەن قامتىلدى. بۇل ماقساتقا 3 ميلليارد 851 ميلليون 500 مىڭ تەڭگەدەي قارجى جۇمسالدى. ال جەرگىلىكتى بيۋدجەتتەن بولىنگەن 540 ميلليون تەڭگەگە 98 ناۋقاسقا قاجەتتى دارىلىك پرەپەراتتار ساتىپ الىندى. قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ۇيرىعىنا سايكەس دارىلىك زاتتارمەن جانە مەديسينالىق بۇيىمدارمەن ءتيىستى پاسيەنتتەر توبىن قامتاماسىز ەتۋدە ءبىرىڭعاي فارماسيەۆتيكالىق اقپاراتتىق جۇيەسىنە ءوتىنىم بەرىلدى. بۇل وتىنىمدە مەديسينالىق ۇيىمدارعا قاجەتتى دارىلىك زاتتار مەن مەديسينالىق بۇيىمدارعا قاجەتتىلىككە ساي ءوتىنىم بەرىلەدى. باسقارما تاراپىنان ناۋقاستاردى دارى-دارمەكتەرمەن قامتاماسىز ەتۋ كەزىندە نارازىلىقتار تۋىنداماس ءۇشىن تەگىن دارى-دارمەك العان ناۋقاستار اراسىندا ارنايى مونيتورينگ تە جۇرگىزىلۋدە. بۇل مونيتورينگكە ساي باسقارما ماماندارى تەگىن ءدارى العان ناۋقاسقا تەلەفون شالىپ، ونىڭ پرەپارات الۋدا كەزىككەن قيىندىقتارى جايىندا سۇراستىرادى،–وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.